Plana etiraz
Xarici işlər naziri Ceyhun Bayramov dekabrın 5-də Rusiyanın paytaxtı Moskvaya səfər edərək həmkarı Sergey Lavrovla görüşüb. Rəsmi məlumata görə, danışıqların yekununda iki ölkənin Xarici İşlər nazirlikləri arasında 2023-2024-cü illər üçün siyasi məsləhətləşmələr planı imzalanıb.
Azərbaycan Demokratiya və Rifah Partiyasının sədri Qubad İbadoğlu replika yayaraq məsləhətləşmələr planını Azərbaycanın xarici siyasətinin Moskvadan idarə olunacağına işarə kimi qiymətləndirib: “Azərbaycanın Xarici İşlər Nazirliyinə BMT-də, ATƏT-də, AŞPA-da və başqa beynəlxalq platformalarda nə etməli olduğu diktə ediləcək. Rusiyanın dünyada diplomatik təsir gücünü itirdiyi dövrdə nədən Azərbaycanın xarici siyasət qurumu Rusiya ilə iki illik məsləhətləşmə planı imzalamalıdır? Rusiyanın məsləhəti ilə qurulan xarici siyasətin hakimiyyət üçün qısamüddətli qazancları uzun vədədə Azərbaycan dövlətinə böyük problemlər yarada bilər”.
AXCP sədri Əli Kərimli də 5 dekabr sənədini etirazla qarşılayıb: “Nə plandır? Azərbaycan nəyə görə bir başqa ölkə ilə yox, məhz Rusiya ilə xarici siyasətini “məsləhətləşəcək”, koordinasiya edəcək? Rusiya Azərbaycanı idarə edənləri girov götürüb ki, xarici siyasətimizi dünyadan təcrid olunmuş bu işğalçı ölkə ilə uzlaşdıraq?”
