Taleh Bağırov tibbi yardımdan imtina edir
Bakıdakı 12 saylı Cəzaçəkmə Müəssisəsində saxlanan Müsəlman Birliyi Hərəkatının sədri Taleh Bağırov aclıq aksiyasını davam etdirir. “Turan”ın məlumatına görə, vəkil Fəxrəddin Mehdiyev dekabrın 3-də Taleh Bağırova baş çəkib. O, Taleh Bağırovun başqa cəzaçəkmə müəssisəsinə köçürülmək tələbi qoyduğunu, tibbi yardımdan, yaxınları ilə telefon əlaqəsi saxlamaqdan və vəkilləri ilə görüşdən imtina etdiyini bildirib.
Taleh Bağırov 12 saylı Cəzaçəkmə Müəssisəsinə noyabrın 26-da Qobustan həbsxanasından köçürülüb. Həyat yoldaşının bildirdiyinə görə, məhbus həmin gün rəis müavininin təhqiri ilə üzləşdiyi üçün aclıq aksiyasına başlayıb.
1984-cü il təvəllüdlü Taleh Bağırov Azərbaycan Dövlət İqtisad Universitetini bitirib, İranda və İraqda dini təhsil alıb.
2011-2012 və 2013-2015-ci illərdə həbsdə olub.
O, 2015-ci ildə yenidən tutulub, 2017-ci ildə dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək 20 il müddətinə azadlıqdan məhrum edilib, 2018-ci ildə həbs yerində qadağan olunmuş əşyaların saxlanması, gəzdirilməsi, daşınması və istifadəsində təqsirli bilinərək daha beş ay müddətinə azadlıqdan məhrumetmə cəzası alıb.
