Miqrasiya qulluqçuları üçün yeniliklər gəlir
Dekabrın 2-də Milli Məclis “Miqrasiya orqanlarında qulluq keçmə haqqında əsasnamə”də dəyişikliklərə son oxunuşda səs verib.
Novator.az-ın məlumatına görə, 80-ci maddə bu redaksiyada olur: “Miqrasiya orqanlarının işçilərinin (pensiyaya çıxmış işçilər də daxil olmaqla) və onların ailə üzvlərinin tibbi təminatı “Tibbi sığorta haqqında” qanuna uyğun həyata keçirilir”.
İndiki redaksiya belədir: “Miqrasiya orqanlarının işçiləri (pensiyaya çıxmış işçilər də daxil olmaqla) və onların ailə üzvləri pulsuz dövlət tibb xidməti ilə təmin olunurlar. Miqrasiya orqanları işçilərinin müalicə olunmaları ilə əlaqədar ildə bir dəfə onlara bir aylıq əməkhaqqı həcmində birdəfəlik müavinət verilir”.
81-ci maddə ləğv edilir. Həmin maddəyə əsasən, miqrasiya orqanlarının işçiləri hər il məzuniyyətə çıxarkən onlara iki aylıq əməkhaqqı həcmində müavinət ödənir.
85-ci maddədə yeniliyə görə, miqrasiya orqanlarının işçilərinə və onların ailə üzvlərinə tibbi xidmətin göstərilməsini müvafiq icra hakimiyyəti orqanının tibb müəssisəsi də həyata keçirə bilər. İndiki qayda “həyata keçirir” formasındadır.
90-cı maddə belə yenilənir: “Miqrasiya orqanlarının işçiləri hər ay vəzifə maaşlarının 1,1 misli məbləğində vəzifə maaşına əlavə alırlar”.
İndiki normaya görə, miqrasiya orqanlarının işçilərinə hər il onların aylıq əməkhaqqının ikiqat həcmində maddi yardım göstərilə bilər.
Yeniliklər 2023-cü il yanvarın 1-dən qüvvəyə minəcək.
