Bölgə reydi
Prezident İlham Əliyev dekabrın 2-də xanımı Mehriban Əliyeva və qızı Leyla Əliyeva ilə birgə Şəkiyə səfər edib. AZƏRTAC xəbər verir ki, dövlət başçısı Qaraməryəm-İsmayıllı-Şəki avtomobil yolunun Oğuz-Şəki hissəsinin yenidənqurmadan sonra açılışında iştirak edib, Orta Zəyzid kəndində “Green Factory” MMC-nin quru meyvə istehsalı müəssisəsində yaradılan şəraitlə tanış olub.
İlham Əliyev həmçinin Şəki Şəhər İcra Hakimiyyətinin yeni inzibati binasına, Şəki Xan məscidi-qəbiristanlıq kompleksinə, “Yuxarı Baş” Milli Tarix-Memarlıq Qoruğu ərazisinə baş çəkib.
Həmin gün Oğuza da səfər edən prezident Daşağıl çayı üzərində “Oğuz-1”, “Oğuz-2”, “Oğuz-3” kiçik su elektrik stansiyaları silsiləsinin, Oğuz şəhərində 100 yerlik körpələr evi-uşaq bağçasının açılışlarına qatılıb.
“Şəki-Oğuz” Aqroparkında yaradılan şəraitlə də tanış olan İlham Əliyev aqroparkın torpaq sahəsinin suvarma suyu ilə təmin edilməsi qurğularını işə salıb, qoz məhsulunun qərzəkdən təmizlənməsi, yuyulması və qurudulması zavodunun təməlini qoyub.
