AZƏRTAC-da yeni rəhbər
Vüqar Əliheydər oğlu Əliyev Azərbaycan Dövlət İnformasiya Agentliyinin (AZƏRTAC) İdarə Heyətinin sədri təyin edilib. Prezident İlham Əliyev sərəncamı noyabrın 28-də imzalayıb.
Əvvəlki sədr Aslan Aslanov noyabrın 19-da postdan götürülmüşdü.
Novator.az bildirir ki, İdarə Heyəti AZƏRTAC-a rəhbərliyi və nəzarəti həyata keçirir. Qurum prezidentin təyin etdiyi sədrdən və onun iki müavinindən, Nazirlər Kabinetinin təyin etdiyi daha 2 üzvdən ibarətdir. Üzvlərin səlahiyyət müddəti 5 ildir.
2016-cı il noyabrın 24-dək AZƏRTAC dövlət orqanı hüquqi statusunda olub. Həmin gün qurumun əsasında publik hüquqi şəxs yaradılıb.
AZƏRTAC-ın missiyası dövlətin və cəmiyyətin həyatının müxtəlif sahələrinə aid informasiya toplamaq, onu yerli və xarici kütləvi informasiya vasitələrinə, Azərbaycanın dövlət orqanlarına, fiziki və hüquqi şəxslərinə çatdırmaq, Azərbaycanı regional və beynəlxalq media qurumlarında təmsil etməkdir.
Əsası 1920-ci il martın 1-də qoyulan AZƏRTAC-ın əsas binası Bakıda, Atatürk prospekti, 70 ünvanında yerləşir.
