Amerika seçkisindən yeni bilgi
“NBC News” kanalı ABŞ Konqresinə 8 noyabr seçkilərinin nəticələri ilə bağlı yeni məlumat yayıb.
Seçkilər 435 nəfərlik alt qanadın – Nümayəndələr Palatasının tam yenilənməsini, 100 nəfərlik yuxarı palatanın – Senatın 35 üzvünün seçilməsini nəzərdə tutub.
Novator.az bildirir ki, noyabrın 24-nə olan hesabata görə, Respublikaçılar Partiyası Nümayəndələr Palatasına 222, Demokratlar Partiyası 213 mandat əldə edir.
Senatda demokratların 50, respublikaçıların 49 yeri var. Corciya ştatından 1 senatorun seçimi dekabrın 6-na təyin olunan ikinci tura qalıb.
ABŞ 50 ştat və 1 federal dairədən ibarətdir. Paytaxt Vaşinqtonun yerləşdiyi Kolumbiya dairəsinin Konqresdə təmsilçiliyi yoxdur.
Nümayəndələr Palatasında ştatların təmsilçiliyi əhalinin sayına bağlıdır. Senata hər ştatdan 2 nəfər seçilir. Vitse-prezident Senatın sədri sayılır, ancaq səsverməyə yalnız səslər tən bölünən hallarda qatıla bilir.
2021-ci il yanvarın 20-dən ölkədə prezident postunu Demokratlar Partiyasından Cozef Bayden tutur.
