Serbiyaya rəsmi səfər
Noyabrın 23-də prezident İlham Əliyevin Serbiyaya rəsmi səfəri başlayıb. AZƏRTAC xəbər verir ki, paytaxt Belqradın “Nikola Tesla” hava limanında dövlət başçısını Serbiya prezidenti Aleksandr Vuçiç qarşılayıb.
Belqraddakı rəsmi qarşılanma mərasimində Serbiya nümayəndə heyətinin üzvləri İlham Əliyevə, Azərbaycanın dövlət və hökumət nümayəndələri Aleksandr Vuçiçə təqdim edilib.
Prezidentlərin təkbətək görüş keçirdiyi bildirilir.
Dövlət başçıları geniş tərkibdə də bir araya gəliblər, sonra sənədlər imzalanıb və İlham Əliyevlə Aleksandr Vuçiç mətbuata bəyanatlarla çıxış ediblər.
İmzalanan sənədlər bunlardır:
“Azərbaycan Respublikası Prezidenti ilə Serbiya Respublikası Prezidenti arasında birgə bəyanat”;
“Azərbaycan Respublikası və Serbiya Respublikası arasında Strateji Tərəfdaşlıq Şurasının yaradılması haqqında memorandum” və onun əlavəsi olan “Azərbaycan Respublikası və Serbiya Respublikası arasında Strateji Tərəfdaşlıq Şurasının əsasnaməsi”;
“Azərbaycan Respublikası Hökuməti ilə Serbiya Respublikası Hökuməti arasında readmissiya haqqında saziş”;
“Azərbaycan Respublikasının Rəqəmsal İnkişaf və Nəqliyyat Nazirliyi ilə Serbiya Respublikasının Tikinti, Nəqliyyat və İnfrastruktur Nazirliyi arasında “Dənizçilərin hazırlanmasına, onlara diplom verilməsinə və növbə çəkməyə dair 1978-ci il tarixli beynəlxalq konvensiya”nın sertifikatlarının tanınması haqqında anlaşma memorandumu”;
“Azərbaycan Respublikası Hökuməti ilə Serbiya Respublikası Hökuməti arasında sosial təminat haqqında saziş”in tətbiqinə dair Azərbaycan Respublikasının Əmək və Əhalinin Sosial Müdafiəsi Nazirliyi ilə Serbiya Respublikasının Əmək, Məşğulluq, Veteranlar və Sosial İşlər Nazirliyi arasında inzibati razılaşma”;
“Azərbaycan Respublikasının Kiçik və Orta Biznesin İnkişafı Agentliyi ilə Serbiya Respublikasının Serbiya İnkişaf Agentliyi arasında anlaşma memorandumu”;
“Azərbaycan Respublikasının İxracın və İnvestisiyaların Təşviqi Agentliyi ilə Serbiyanın Ticarət və Sənaye Palatası arasında anlaşma memorandumu”.
