Niyə bitərəf?
BMT Baş Məclisinin üçüncü komitəsi İranda insan hüquqlarının pozulmasını pisləyən qətnamə qəbul edib. Azərbaycan noyabrın 16-da keçirilmiş səsvermədə bitərəf qalıb. Novator.az-ın məlumatına görə, AXCP sədri Əli Kərimli bununla bağlı replika yayıb: “Bu dəfə də istismar etdikləri xalqı millətçi maskası ilə aldatmağa hazırlaşırdılar, ancaq alınmadı. Azərbaycan hakimiyyəti BMT-də İranın insan hüquqlarını pozması haqda qətnaməyə səs verməyib, bitərəf qalıb. Mətbuatda hay-küy salmalarına, güneyli azərbaycanlıları müdafiə edəcəkləri ilə bağlı piar kampaniyalara baxmayın, söhbət insan haqlarından gedincə bütün antidemokratik rejimlər xalqların azadlıqlar uğrunda mübarizəsinə qarşı birləşir.
Əgər BMT öz xalqı ilə qarşıdurmada 400 nəfərdən artıq vətəndaşını öldürən, 17 min nəfərə qədər etirazçını həbs etdirən rejimdən də insan hüquqlarına hörmət tələb etməyəcəksə, bəs kimdən tələb edəcək? Belə bir qətnaməyə necə səs verməmək olar?”
Sentyabrın 18-dən İranda davamlı etiraz aksiyaları keçirilir. Etirazlar gənc kürd qadın Məhsa Əmininin ölümündən sonra başlanıb. Sentyabrın 13-də əxlaq polisinin hicab qaydalarını pozma ittihamı ilə tutduğu Məhsa Əmini üç gün sonra xəstəxanada dünyasını dəyişib. Çoxları gənc qadının fiziki zorakılığın qurbanı olduğuna inanır.
