AZƏRTAC arayışı
Prezident İlham Əliyevin 19 noyabr sərəncamı ilə Aslan Aslanov Azərbaycan Dövlət İnformasiya Agentliyinin (AZƏRTAC) İdarə Heyətinin sədri vəzifəsindən azad edilib.
İdarə Heyəti AZƏRTAC-a rəhbərliyi və nəzarəti həyata keçirir. Qurum prezidentin təyin etdiyi sədrdən və onun iki müavinindən, Nazirlər Kabinetinin təyin etdiyi daha 2 üzvdən ibarətdir. Üzvlərin səlahiyyət müddəti 5 ildir.
Aslan Aslanov 15 mart 2018-ci ildən İdarə Heyətinin sədri idi. 30 oktyabr 2002-ci ildən isə Aslan Aslanov baş direktor postunu tutub.
Novator.az bildirir ki, 2016-cı il noyabrın 24-dək AZƏRTAC dövlət orqanı hüquqi statusunda olub. Həmin gün qurumun əsasında publik hüquqi şəxs yaradılıb.
AZƏRTAC-ın missiyası dövlətin və cəmiyyətin həyatının müxtəlif sahələrinə aid informasiya toplamaq, onu yerli və xarici kütləvi informasiya vasitələrinə, Azərbaycanın dövlət orqanlarına, fiziki və hüquqi şəxslərinə çatdırmaq, Azərbaycanı regional və beynəlxalq media qurumlarında təmsil etməkdir.
Əsası 1920-ci il martın 1-də qoyulan AZƏRTAC-ın əsas binası Bakıda, Atatürk prospekti, 70 ünvanında yerləşir.
