Sanksiya hədəsinin riski
İqtisadçı alim, ADR Partiyasının sədri Qubad İbadoğlu Azərbaycanda Fransa şirkətlərinə sanksiyalar tətbiq etmək hədələrini dayandırmağa çağırır.
Fransa parlamentinin yuxarı palatası olan Senat 15 noyabr qətnaməsində Azərbaycanı Ermənistana təcavüzdə, Qarabağ ermənilərinin hüquqlarını pozmaqda günahlandırıb, hökuməti Azərbaycana sanksiyalar (ölkə liderlərinin aktivlərinin müsadirəsi, Azərbaycandan neft və qaz almağa embarqo qoyulması) tətbiqinə çağırıb, Dağlıq Qarabağ rejimini müstəqil dövlət kimi tanımağın zəruri olduğunu vurğulayıb. Azərbaycan Milli Məclisinin 16 noyabr iclasında həmin qətnamə pislənib, hökumətə çağırışlar edilib. Çağırışların içində Fransa şirkətlərinin Azərbaycan dövlətinin sifarişi ilə həyata keçirilən hər hansı layihədə iştirakına yol verilməməsi və Fransa şirkətlərinin Azərbaycan tərəfi ilə enerji sektorunda əməkdaşlığına yenidən baxılması da var.
Novator.az-ın məlumatına görə, Qubad İbadoğlu yazır ki, Azərbaycanın mədən-hasilat sənayesi, kənd təsərrüfatı, nəqliyyat, logistika və xidmət sahələrində 50-dək Fransa şirkəti fəaliyyət göstərir: “Onların arasında tanınmış “Total” şirkəti də var. Bu günə qədər Fransa şirkətləri Azərbaycan iqtisadiyyatına 2,25 milyard dollara qədər sərmayə qoyub.
2022-ci ilin yanvar-oktyabr aylarında Fransa ilə xarici ticarət dövriyyəsi 235,7 milyon dollar olub, onun 49,5 milyon dollarını ixrac, 186,2 milyon dollarını idxal təşkil edib. Fransa Azərbaycanın idxalda 15-ci tərəfdaşıdır, ixracda isə ilk 20-liyə də düşmür.
Fransa ilə Azərbaycanın iqtisadi əlaqələri sıx deyil, amma bu ölkənin şirkətlərinə sanksiyalar tətbiq etmək çağırışları ziyanlıdır, onu dayandırmaq lazımdır. Belə çağırışlar Azərbaycan iqtisadiyyatına, xüsusilə də qeyri-neft sektoruna hər il azalan xarici yatırımları daha da məhdudlaşdırmaqla yanaşı xarici şirkətlərin Azərbaycanı tərk etməsinə gətirib çıxara bilər. Onsuz da milli iqtisadiyyatın xarici kapitala və texnologiyalara ehtiyacının kəskin artdığı indiki dövrdə xarici şirkətlər əlverişsiz investisiya mühitinə və inhisarçılığa görə Azərbaycanı tərk edirlər. Unutmayaq ki, dünyanın 500 iri şirkətindən 28-i Fransada yerləşir”.
