Xarici medianın Azərbaycan qeydiyyatı
Xarici media nümayəndələrinin Azərbaycanda fəaliyyəti necə tənzimlənir?
Novator.az bildirir ki, “Media haqqında” qanuna görə, Azərbaycanda xarici media subyektlərinin filial və nümayəndəlikləri ölkənin tərəfdar çıxdığı beynəlxalq müqavilələrdə nəzərdə tutulmuş hallarda açılır. Xarici jurnalistlərin akkreditasiyasını Xarici İşlər Nazirliyi (XİN) həyata keçirir. Akkreditasiya qaydaları XİN Kollegiyasının 1 avqust 2022-ci il qərarı ilə rəsmiləşib. Qaydalara görə, xarici media nümayəndələrinin akkreditasiyası üçün bu sənədlər tələb olunur: xarici media nümayəndəsinin təmsil etdiyi xarici media subyektinin nümayəndəliyinin rəhbərinin və ya onu əvəz edən şəxsin XİN-ə müraciət məktubu; xarici media nümayəndəsinin doldurduğu ərizə-anket; iki ədəd 3×4 sm ölçüdə rəngli fotoşəkil; xarici media nümayəndəsinin pasportunun və ya sərhədi keçmək hüququ verən digər sənədinin (xarici media nümayəndəsi Azərbaycan vətəndaşıdırsa onun şəxsiyyət vəsiqəsinin) surəti; xidməti vəsiqənin (jurnalist vəsiqəsinin) surəti; tərcümeyi-hal.
Akkreditasiya barədə müraciətə 30 gün ərzində baxılır və baxılmanın nəticəsi müsbət olduğu təqdirdə xarici media nümayəndələrinə akkreditasiya kartı verilir. Akkreditasiya kartı etibarlı olduğu dövr ərzində onun sahibinə Azərbaycanda jurnalist və ya operator fəaliyyəti ilə məşğul olmaq hüququ verir.
Uzunmüddətli akkreditasiya 1 illik, qısamüddətli akkreditasiya konkret səfər müddətinə olur.
Xarici media nümayəndələri akkreditasiya kartını XİN-dən şəxsən təhvil alırlar. Akkreditasiya kartı başqa şəxsə verilə bilməz.
Əcnəbi və ya vətəndaşlığı olmayan xarici media nümayəndələrinin Azərbaycana gəlməsi və Azərbaycandan getməsi, Azərbaycanda müvəqqəti olması, onlara müvəqqəti və daimi yaşamaq üçün icazələrin verilməsi, onların qeydiyyata alınması Miqrasiya Məcəlləsi ilə tənzimlənir.
