“525”in 30 yaşı
Noyabrın 17-də “525-ci qəzet”in 30 yaşı tamam olur.
Novator.az bildirir ki, 1992-ci ildə Rəşad Məcidin təsisçiliyi ilə həftəlik qəzet kimi qurulan “525” indi çərşənbə axşamı, çərşənbə, cümə axşamı, cümə, şənbə günləri çıxır.
Qəzetin ilk redaktoru Yusif Rzayevdir. 1968-ci il təvəllüdlü Yusif Rzayev Bakı Dövlət Universitetinin jurnalistika fakültəsinin məzunudur. “Ədalət” (müxbir), “Müxalifət” (müxbir, şöbə müdiri), “Respublika” (baş redaktor) qəzetlərində çalışıb. Hazırda “525”də baş redaktorun birinci müavinidir.
Yusif Rzayevdən sonra qəzetə Səbuhi Məmmədli və Yaşar Əliyev redaktorluq ediblər.
1995-ci ildən Rəşad Məcid baş redaktordur.
1964-cü il təvəllüdlü Rəşad Məcid Bakı Dövlət Universitetinin jurnalistika fakültəsini bitirib. “Elm və həyat” jurnalında korrektor, müxbir vəzifələrində çalışıb, Azərbaycan Bədii Tərcümə və Ədəbi Əlaqələr Mərkəzinin sədr müavini, “Ədalət” və “Azərbaycan” qəzetlərinin baş redaktor müavini, “Azərmətbuatyayımı” İstehsalat Birliyinin rəisi, Azərbaycan Tərcümə Mərkəzinin məsul katibi olub.
Azərbaycan Yazıçılar Birliyi sədrinin müavini, Azərbaycan Mətbuat Şurasının sədridir.
