Büdcə zərfində nələr var?
Milli Məclis 2023-cü ilin büdcə zərfinin layihələrini açıqlayıb. Sənədlərin müzakirəsi noyabrın 16-da başlayır.
Novator.az bildirir ki, dövlət büdcəsi layihəsində 30 milyard 720,7 milyon manat gəlir, 33 milyard 300 milyon manat xərc nəzərdə tutulur.
Dövlət Sosial Müdafiə Fondunun büdcə layihəsində gəlirlər və xərclər 6 milyard 263,9 milyon manat, işsizlikdən sığorta fondunun büdcə layihəsində gəlirlər və xərclər 212,7 milyon manat göstərilir.
2023-cü il üçün yaşayış minimumu və ünvanlı dövlət sosial yardımının təyin edilməsi məqsədilə ehtiyac meyarının həddi 246 manat götürülür.
Əmək qabiliyyətli əhali üçün 261 manat, pensiyaçılar üçün 199 manat, uşaqlar üçün 220 manat müəyyən edilən yaşayış minimumu rəsmi minimum istehlak səbətinə əsaslanır. Səbətə ərzaq məhsulları, qeyri-ərzaq malları, xidmətlər daxildir.
“Ünvanlı dövlət sosial yardımı haqqında” qanuna əsasən, sosial yardım orta aylıq gəliri onlardan asılı olmayan bəzi səbəblərdən hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.
