Müsavat israr edir
Müsavat Partiyası noyabrın 15-i Bakıda, İranın Azərbaycandakı səfirliyinin binası önündə piket keçirmək niyyətindədir. Saat 15-ə təyin olunan aksiyanın əsas şüarı “Azadlıq, ədalət, milli hökumət!” şüarıdır.
Başqan Arif Hacılı bildirir ki, aksiyada İranın anti-Azərbaycan siyasətinə və bu ölkədə dinc aksiyaçılara qarşı amansız davranışlara etiraz nəzərdə tutulub: “Bakı Şəhər İcra Hakimiyyəti aksiya keçirməyi məqsədəuyğun saymayıb. Biz piket üçün müraciət edəndə niyyətimiz şəhər rəhbərliyinin rəyini öyrənmək deyildi. Konstitusiya hüququmuzdan qanuni yolla istifadə edəcəyimizi bildirmişdik. Yox cavabı verilsə də, sərbəst toplaşmaq azadlığı hüququna əsaslanaraq aksiyamızı keçirəcəyik”.
Sentyabrın 18-dən İranda davamlı etiraz aksiyaları keçirilir. Etirazlar gənc kürd qadın Məhsa Əmininin ölümündən sonra başlanıb. Sentyabrın 13-də əxlaq polisinin hicab qaydalarını pozma ittihamı ilə tutduğu Məhsa Əmini üç gün sonra xəstəxanada dünyasını dəyişib. Çoxları gənc qadının fiziki zorakılığın qurbanı olduğuna inanır.
