Aksiyanın cəzası
Bakıda noyabrın 11-də keçirilmiş aksiyada tutulan AXCP üzvü Rövşən Məmmədova 30 sutka inzibati həbs cəzası verilib. “Turan”ın məlumatına görə, qərarı noyabrın 12-də Səbail Rayon Məhkəməsi polis əməkdaşının qanuni tələbinə qəsdən tabe olmamaq ittihamı ilə çıxarıb.
İlkin xəbərlərdə Rövşən Məmmədovun polisin xidməti avtomobilinin şüşəsini sındırdığı üçün saxlandığı bildirilirdi.
Noyabrın 11-də bir qrup AXCP üzvü və başqa fəallar paytaxtın İstiqlaliyyət küçəsində, Bakı Şəhər İcra Hakimiyyətinin binası qarşısında aksiya keçirməyə cəhd göstərib. Polis əməkdaşları ərazidə toplaşmaq istəyənləri dağıdıb.
AXCP rəsmiləri Bakı Şəhər İcra Hakimiyyətinə müraciətdə sosial və siyasi tələbli piketə şərait yaradılmasını istəmişdi. Təşəbbüsçülərə göndərilən cavab məktubunda aksiyanın məqsədəuyğun sayılmadığı vurğulanmış, ancaq AXCP piketi keçirməyə qərar vermişdi.
Aksiyanın əsas tələbləri kimi vətəndaşların sərbəst toplaşmaq hüququna maneələrin aradan qaldırılması, siyasi məhbusların azadlığa buraxılması, ölkənin quru sərhədlərinin açılması göstərilmişdi.
