Komandan ziyarəti
AZƏRTAC-ın 7 noyabr məlumatına görə, prezident, Silahlı Qüvvələrin ali baş komandanı İlham Əliyev Füzuli rayonunda Müdafiə Nazirliyinin yeni hərbi hissəsində yaradılan şəraitlə tanış olub.
Dövlət başçısı hərbi şəhərcikdə şəhidlərin xatirəsinə ucaldılmış abidə kompleksinin önünə gül dəstəsi qoyub, orada ağac əkib, qərargah binasına baş çəkib.
Rəsmi arayışa görə, hərbi şəhərcikdə qərargah, yeməkxana, tibb məntəqəsi, əsgər yataqxanaları, hamam-camaşırxana, avtomobil parkı, müxtəlif təyinatlı anbarlar, eləcə də digər infrastruktur obyektləri, döyüş hazırlığının və qoşun xidmətinin yüksək səviyyədə təşkili, döyüş əməliyyatları zamanı bölmələrin operativ idarə olunması, eləcə də digər qoşun növləri ilə qarşılıqlı əlaqənin təmin edilməsi üçün müasir kommunikasiya və informasiya vasitələri ilə təchiz olunmuş idarəetmə mərkəzi, rabitə qovşağı və digər xidməti otaqlar var.
Prezident əsgər yataqxanası, əsgər yeməkxanası və idman zalına baxış keçirib.
Şəhərcikdə iki və üçmərtəbəli yaşayış binaları, məktəb və uşaq bağçası tikilib, hərbi qulluqçuların səmərəli istirahəti üçün müasir standartlara uyğun şərait yaradılıb.
İlham Əliyev mənzillərdə yaradılmış şəraitlə də tanış olub.
