Yox cavabı
Bakı Şəhər İcra Hakimiyyəti Azərbaycan Xalq Cəbhəsi Partiyası (AXCP) rəsmilərinin piketlə bağlı müraciətinə mənfi cavab verib. Partiya piketi noyabrın 11-i saat 15-də İstiqlaliyyət küçəsində, Bakı Şəhər İcra Hakimiyyətinin binası qarşısında keçirmək, sosial və siyasi tələblər qoymaq istəyir. Noyabrın 4-də aksiya təşəbbüsçülərinə göndərilən cavab məktubunda bildirilib ki, piket üçün seçilən ərazi əhalinin və nəqliyyatın intensiv hərəkət etdiyi məkandır, orada toplaşmaq məqsədəuyğun sayılmır.
AXCP üzvləri və başqa fəallar sentyabrın 30-da Milli Məclisin binası qarşısında, oktyabrın 24-də Bakı Şəhər İcra Hakimiyyətinin binası qarşısında aksiya keçirməyə cəhd göstəriblər. Paytaxt hakimiyyəti həmin aksiyalara da razılıq verməmişdi.
Azərbaycan Xalq Cəbhəsi 1989-cu ildə yaradılıb, 1995-ci ildə partiyaya çevrilib. 2000-ci ildən partiyaya Əli Kərimli liderlik edir.
