Siyasi məhbus siyahısı yenilənib
Hüquq müdafiəçiləri Leyla Yunusla Elşən Həsənov siyasi məhbus siyahısını yeniləyib. “Turan”ın 4 noyabr məlumatına görə, siyasi məhbus sayılan 100 nəfər 7 qrupa bölünüb.
6 jurnalist və bloqçu, müxalif partiyaların və hərəkatların 4 üzvü, Almaniyadan deportasiya olunmuş 5 sabiq siyasi mühacir, 18 inanclı, “Tərtər işi” üzrə tutulan 27, “Gəncə işi” üzrə tutulan 27 nəfər, 13 ömürlük məhkum siyasi məhbus sayılır.
Avropa Şurasının meyarlarına əsasən, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
2017-ci ildə əsasən Tərtər istiqamətində bir qrup hərbi qulluqçu və mülki şəxs düşmən kəşfiyyatı ilə məxfi əməkdaşlıq ittihamı ilə tutulub.
Bir qrup şəxs 2018-ci ildə Gəncənin icra başçısına qəsdə, şəhərdə iki polis zabitinin həlak olmasına gətirən hadisələrə görə tutulub.
