Şərti düşmənin dərinliyində…
Müdafiə Nazirliyinin 3 noyabr məlumatına görə, Xüsusi Təyinatlı Qüvvələrin hərbi hissələrinin təlimində şərti düşmənin dərinliyində müxtəlif kəşfiyyat tapşırıqları və xüsusi əməliyyatlar yerinə yetirilib, aviasiya və artilleriya vasitələrinin, zərbə dronlarının dəstəyi ilə hədd və məntəqələr nəzarətə götürülüb.
Xüsusi hazırlıqların yoxlanması paralel davam etdirilir, o cümlədən hərbi qulluqçuların yüksək dağlıq, meşəlik ərazilərdə döyüş tapşırıqlarının icrası və çətin maneələr sisteminin dəf edilməsi üzrə peşəkarlıq səviyyəsi yoxlanır.
Xüsusi Təyinatlı Qüvvələrin təlimi noyabrın 2-də başlayıb. Azərbaycanın İranla sərhədinə yaxın ərazilərindəki təlimə Xüsusi Təyinatlı Qüvvələrin komandanı general-leytenant Hikmət Mirzəyev rəhbərlik edir.
Noyabrın 3-də müdafiə naziri general-polkovnik Zakir Həsənov cənub rayonlarında yerləşən hərbi hissə və birləşmələrin döyüş hazırlığını yoxlayıb, Xüsusi Təyinatlı Qüvvələrin təlimini izləyib.
