“Qarabağ” Konfrans Liqasına köçdü
Azərbaycan təmsilçisi “Qarabağ” UEFA Avropa Liqasının G qrupunda son oyununu keçirib. Komanda noyabrın 3-ü Bakıda “Frayburq”la (Almaniya) sülh bağlayıb – 1:1.
“Olimpiakos” (Yunanıstan) evdə “Nant”a (Fransa) 2 cavabsız topla uduzub.
Novator.az-ın məlumatına görə, “Frayburq” qrup birincisi kimi 1/8 finala çıxıb, ikinci yeri tutan “Nant” həmin mərhələyə vəsiqə üçün Çempionlar Liqasından ələnən komanda ilə oynayacaq, üçüncü yeri tutan “Qarabağ” Konfrans Liqasına köçərək həmin turnirin 1/8 finalına bilet uğrunda yarışacaq.
2022-2023 mövsümünə Çempionlar Liqasında başlayan “Qarabağ” Polşanın “Lex”, İsveçrənin “Sürix”, Macarıstanın “Ferensvaroş” komandalarını ələmiş, Çexiyanın “Viktoriya” komandasına yenilərək Avropa Liqasına adlamışdı.
“Qarabağ” 2014-2015, 2015-2016, 2016-2017, 2018-2019, 2019-2020, 2020-2021 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb, 2021-2022-ci il mövsümündə Konfrans Liqasının qrup mərhələsində yer alaraq növbəti raunda vəsiqə əldə edib.
