Fondumuz fondlar içində
İqtisadçı, ADR Partiyasının sədri Qubad İbadoğlu Dövlət Neft Fondunun (DNF) doqquz aylıq hesabatına nəzər salıb: “2022-ci ilin yanvar-sentyabr aylarında DNF neft və qaz sazişlərinin həyata keçirilməsindən 15 milyard 886,9 milyon manat alıb. Lakin büdcə gəlirləri 11 milyard 365,9 milyon manat həddində rəsmiləşib. Səbəb DNF-nin aktivlərinin bazar dəyərində 4 milyard 521 milyon manat itki yaranmasıdır. Fondun valyuta məzənnələrinin dəyişməsindən yaranan fərqlə bağlı büdcədənkənar xərcləri 4 milyard 185,2 milyon manat göstərilib”.
Novator.az-ın məlumatına görə, Qubad İbadoğlu yazır ki, 2016-2021-ci illərdə DNF-nin investisiya portfelinin orta gəlirliliyi cəmi 2,46 faiz olub: “Başqa suveren rifah fondlarının analoji göstəricisi belədir: ATP (Danimarka) – 19,5 faiz, “NZ Super” (Yeni Zelandiya) – 11,8 faiz, “Alyaska” (ABŞ) – 10 faiz, “Future Fund” (Avstraliya) – 9 faiz, GİC (Sinqapur) – 8,9 faiz, NSSF (Çin) – 8,8 faiz, NMSİC (ABŞ) – 8,2 faiz, CİC (Çin) – 8 faiz, NBİM (Norveç) – 7,7 faiz, WYO (ABŞ) – 7,1 faiz, KİC (Cənubi Koreya) – 6,9 faiz, TEMASEK (Sinqapur) – 6 faiz”.
DNF 1999-cu ildə yaradılıb. Qurumun Müşahidə Şurasına baş nazir Əli Əsədov sədrlik edir, icraçı direktor postunu İsrafil Məmmədov tutur.
