“Putinin aşpazı” “Youtube” kanalını bağlamağa çağırır
Rusiyalı milyarder Yevgeni Priqojin ölkənin baş prokuroru İqor Krasnova müraciət edərək “Youtube” kanalının Rusiya ərazisində bağlanmasını istəyib.
Yevgeni Priqojin Rusiyada təkcə iş adamları arasında yox, həm də hərbi və siyasi elitada nüfuzlu şəxslərdən biri sayılır. Onun iri restoran şəbəkəsi var. Prezident Vladimir Putin üçün dəbdəbəli rəsmi ziyafətlər təşkil etdiyinə görə Priqojini “Putinin aşpazı” da adlandırırlar. Rusiyanın muzdlulardan ibarət “Vaqner” qeyri-rəsmi hərbi birləşməsini də Yevgeni Priqojin maliyyələşdirir.
Novator.az-ın məlumatına görə, baş prokurora müraciətində Priqojin “Youtube” kanalının tabe olduğu “Google” şirkətinin Rusiyada arzuolunmaz şirkət elan edilməsi tələbini də qoyub.
Priqojin iddia edib ki, “Youtube” kanalı ilə Rusiya Silahlı Qüvvələrini, dövlət orqanlarını nüfuzdan salan saxta məlumatlar yayılır.
Onun fikrincə, ABŞ Rusiya ilə apardığı informasiya müharibəsində “Youtube” platformasından alət kimi yararlanır.
