Müzakirələr necə bitib?
Azərbaycan prezidenti İlham Əliyev, Rusiya prezidenti Vladimir Putin və Ermənistanın baş naziri Nikol Paşinyanın oktyabrın 31-i Soçidə keçirdiyi üçtərəfli görüşdən məlumat yayılıb. İki saatdan bir qədər çox çəkən görüşdən sonra Rusiya prezidenti müzakirələrin səmərəli olduğunu, üçtərəfli bəyanatın qəbul edildiyini bildirib.
Bəyanatda tərəflərin güc tətbiqindən, güc tətbiqi ilə hədədən çəkinməyə, bütün problemli məsələlərin yalnız suverenliyin, ərazi bütövlüyünün, sərhədlərin toxunulmazlığının qarşılıqlı tanınması əsasında müzakirə və həll olunmasına razılaşdığı qeyd edilir.
Vladimir Putin deyib ki, bəyanatda hər şeyi razılaşdırmaq mümkün olmayıb, mütəxəssislər səviyyəsində işlənmiş mətndən bəzi hissələr çıxarılıb.
Ermənistan 1988-1994-cü illərin təcavüzündə Azərbaycanın altıda birini işğal edərək Yuxarı Qarabağ bölgəsində separatçı rejim qurub.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlar nəticəsində ərazilərin böyük hissəsi azad olunub.
Yuxarı Qarabağ bölgəsindəki Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi, Ermənistana gedən Laçın yolu separatçı rejimlə Rusiya hərbi kontingentinin nəzarətindədir.
Sədərək rayonunun 1, Qazax rayonunun 7 kəndi də işğalda qalır.
Azərbaycanın Ermənistana təqdim etdiyi sülh planında ərazi bütövlüyünün qarşılıqlı tanınması, ərazi iddiasından çəkinmək, güc tətbiq etməmək və güc tətbiq etməklə hədələməmək, dövlət sərhədlərinin müəyyən edilməsi və kommunikasiyaların açılması prinsipləri əks olunub.
