Son tur ərəfəsində
UEFA-nın klub turnirlərində 2022-2023 mövsümünün qrup raundları finişə yön alıb. Novator.az bildirir ki, son tur ərəfəsində Çempionlar Liqasında qaldığı dəqiqləşən komandaların 8-i titul sahibidir. 1955-ci ildən keçirilən, 1991-ci ilə qədər Çempionlar kuboku adlanmış turnirdə “Real” 14, “Bavariya”, “Liverpul” 6, “İnter” (İtaliya) 3, “Benfika”, “Portu”, “Çelsi” 2, “Borussiya” (Dortmund) 1 zəfər qazanıb.
Avropa Liqasında növbəti mərhələyə düşən 3 komandanın turnirdə zəfəri var. 1971-ci ildən keçirilən, 2008-ci ilədək UEFA kuboku adlanmış turnirdə “Sevilya” 6, PSV, “Mançester Yunayted” 1 titul əldə edib.
Konfrans Liqasında ilk mövsümü – 2021-2022 mövsümünü udan “Roma” Avropa Liqasında yarışır.
Azərbaycan təmsilçisi “Qarabağ” Avropa Liqasının G qrupunda mübarizə aparır, 7 xalla ikinci yerdədir, mübarizəni ən azı Konfrans Liqasında davam etdirəcəyi bilinir.
Ölkə 55 üzvü olan UEFA-nın klub reytinqində 29-cu yerdədir. 2022-2023 mövsümündə komandaları qalan Türkiyə 13-cü, Ukrayna 15-ci, Moldova 32-ci, Latviya 35-ci, Litva 38-ci, Ermənistan 39-cu pillədə qərar tutub.
Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Qrup mərhələsi və sonrakı raundlar üçün 1-5 arası bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
2022-2023 mövsümündə Azərbaycan 3,250 əmsal əldə edib.
