“Azərbaycan Dəmir Yolları”nın yeni sədri
Rövşən Rüstəmov rəqəmsal inkişaf və nəqliyyat nazirinin müavini vəzifəsindən azad olunaraq “Azərbaycan Dəmir Yolları” Qapalı Səhmdar Cəmiyyətinin sədri təyin edilib. Prezident İlham Əliyev sərəncamları oktyabrın 26-da imzalayıb.
“Azərbaycan Dəmir Yolları” Qapalı Səhmdar Cəmiyyətinin sədri postu 2022-ci il mayın 24-dən boş idi. Həmin gün sədr vəzifəsindən çıxarılan Cavid Qurbanov rəqəmsal inkişaf və nəqliyyat nazirinin müavini postuna təyinat alıb.
1980-ci il təvəllüdlü Rövşən Mürvət oğlu Rüstəmov iqtisadiyyat üzrə fəlsəfə doktorudur.
Əmək fəaliyyətinə 2002-ci ildə jurnalist kimi başlayıb. 2004-cü ilin iyul ayından “Azərpoçt” MMC-də iqtisadçı, şöbə müdirinin müavini, şöbə müdiri, “Azərkosmos” ASC-də korporativ idarəetmə üzrə baş mütəxəssis, korporativ idarəetmə üzrə müşavir, “Azərkosmos”un sədr müavini vəzifələrində çalışıb. 2021-ci ilin iyun ayından Nəqliyyat, Rabitə və Yüksək Texnologiyalar Nazirliyində (sonradan Rəqəmsal İnkişaf və Nəqliyyat Nazirliyi) nazir müavini olub.
