Akademiya prezident seçdi
Oktyabrın 25-də Azərbaycan Milli Elmlər Akademiyasının (AMEA) ümumi yığıncağı keçirilib, yeni nizamnamə qəbul edilib, İsa Həbibbəyli prezident seçilib.
1949-cu il təvəllüdlü İsa Həbibbəyli filologiya elmləri doktoru, Ədəbiyyat İnstitutunun direktorudur.
Naxçıvan Dövlət Universitetinin rektoru olub. 2013-cü ildən AMEA-nın vitse-prezidenti idi.
Əməkdar elm xadimidir.
2005-ci ildən Milli Məclisin deputatıdır.
Novator.az bildirir ki, ümumi yığıncaq AMEA-nın ali idarəetmə orqanıdır. Həqiqi üzvlərdən ibarət ümumi yığıncağın seçdiyi prezident Azərbaycan prezidentinin sərəncamı ilə təsdiqlənməlidir.
Əsası 1945-ci ildə qoyulan AMEA-nın prezidenti postunu bu şəxslər tutub: Mir Əsədulla Mirqasımov, Musa Əliyev, Yusif Məmmədəliyev, Zahid Xəlilov, Rüstəm İsmayılov, Həsən Abdullayev, Eldar Salayev, Fəraməz Maqsudov, Mahmud Kərimov, Akif Əlizadə, Ramiz Mehdiyev.
2022-ci il fevralın 19-dan prezident səlahiyyətləri birinci vitse-prezident vəzifəsinin icraçısı Arif Həşimovda idi.
Prezident İlham Əliyevin 28 iyul 2022-ci il fərmanı ilə Təhsil Nazirliyinin və AMEA-nın bazasında Elm və Təhsil Nazirliyi yaradılıb. Akademiyanın bəzi qurumları Elm və Təhsil Nazirliyinin, bəzi qurumları Mədəniyyət Nazirliyinin tabeliyinə verilib, bəzi qurumlar onun strukturunda saxlanıb.
Sentyabrın 30-da Nazirlər Kabineti akademiyanın strukturunu belə müəyyən edib: Rəyasət Heyətinin Aparatı; Respublika Seysmoloji Xidmət Mərkəzi; Tarix İnstitutu; Arxeologiya, Etnoqrafiya və Antropologiya İnstitutu; Şərqşünaslıq İnstitutu; Fəlsəfə və Sosiologiya İnstitutu; Ədəbiyyat İnstitutu; Dilçilik İnstitutu; Memarlıq və İncəsənət İnstitutu; Əlyazmalar İnstitutu; Folklor İnstitutu; Qafqazşünaslıq İnstitutu; “Azərbaycan Milli Ensiklopediyası” Elmi Mərkəzi; Lənkəran Regional Elmi Mərkəzi; Şəki Regional Elmi Mərkəzi; Mərkəzi Elmi Kitabxana; “Elm” Nəşriyyatı; Naxçıvan bölməsinin Aparatı; Naxçıvan bölməsinin tabeliyində olan elmi müəssisələr – Tarix, Etnoqrafiya və Arxeologiya İnstitutu; İncəsənət, Dil və Ədəbiyyat İnstitutu; Əlyazmalar Fondu; Gəncə bölməsinin Aparatı; Gəncə bölməsinin tabeliyində olan elmi müəssisələr – Humanitar Tədqiqatlar İnstitutu; Diyarşünaslıq İnstitutu; Nizami Gəncəvi Mərkəzi.
