Əli Kərimli: “Belə davam etməməlidir”
AXCP sədri Əli Kərimli Bakıdakı 24 oktyabr aksiyasından yazıb.
Oktyabrın 24-də AXCP üzvləri və başqa fəallar Bakı Şəhər İcra Hakimiyyətinin binası qarşısında aksiya keçirməyə cəhd göstərib. Polis əməkdaşları toplaşmağa imkan verməyib, bir çox aksiyaçını saxlayıb.
Paytaxt rəhbərliyinə müraciətdə AXCP rəsmiləri Bakı Şəhər İcra Hakimiyyətinin binası qarşısında piket keçirmək istədiyini bəyan etmiş, aksiyanın əsas tələbi kimi sərbəst toplaşmaq azadlığının təmin edilməsi göstərilmiş, sosial və siyasi yönlü başqa tələblərin də qoyulacağı vurğulanmışdı. Bakı Şəhər İcra Hakimiyyəti aksiyaya razılıq verməmiş, ancaq AXCP aksiya qərarını qüvvədə saxlamışdı.
Novator.az-ın məlumatına görə, oktyabrın 25-də açıqlama yayan Əli Kərimli qeyd edir ki, Azərbaycan xalqı polis zorakılığına, qəddarlığa, antiinsani rəftara etiraz etməlidir: “24 oktyabr aksiyasında 200 nəfərə yaxın adam zorakılıqla saxlanıb. Dinc etiraz aksiyasına qoşulmuş AXCP üzvləri, digər müxalifətçilər və fəal vətəndaşlar hakimiyyətdən sadəcə hamı üçün hüquq və azadlıq tələb edirdilər. Onlar bu dövlətin düşməni yox, bu dövləti quran, dövlətlərindən ötrü canlarından keçməyə hazır olan vətən, millət sevdalılarıdır. Ancaq hakimiyyəti qəsb etmiş korrupsioner dəstə həmin dinc etirazçılarla növbəti dəfə düşməncəsinə davrandı.
Etiraf edirik ki, qüvvələr nisbəti hələ də şərin, zorbalığın xeyrinədir. Qorxusuna qalib gələnlər hələ də çox deyil. Rejimi qoruyan polislər isə çoxdur. Ancaq belə davam edə bilməz. Belə davam etməməlidir. Vicdanlı insanlar haqqın zorla əzilməsinə, ədalətin tapdalanmasına, insafın yoxa çıxmasına susmamalıdır. Bu zorbalığın durdurulmasını hamı tələb etməlidir. Bütün xalqlar fədakar mübarizələr sayəsində xilas olub. Biz də xilas olacağıq. Çox, həmrəy və cəsarətli olmağımız lazımdır”.
