Sloveniyada seçki yarışı ikinci tura keçdi
Sloveniyada oktyabrın 23-də keçirilmiş prezident seçkisi qalibi müəyyən etməyib. Novator.az bildirir ki, yeddi nəfərin qatıldığı yarışın ilkin nəticələrinə görə, Demokrat Partiyasının namizədi, sabiq xarici işlər naziri Anje Loqar 33,9 faiz, müstəqil namizəd, vəkil Nataşa Pirts-Musar 26,8 faiz səslə ikinci tura çıxır. İkinci tur noyabrın 13-nə təyin olunub.
Parlament respublikası olan Sloveniyada prezident dövlət başçısı sayılır. 2012 və 2017-ci illərdə Borut Pahor prezident seçilib. Onun səlahiyyət müddəti dekabrın 23-də başa çatır.
2022-ci il aprelin 24-də keçirilmiş parlament seçkisində “Azadlıq” hərəkatı qalib gəlib. Hazırda baş nazir postunu bu partiyanın lideri Robert Qolob tutur.
