İtaliyada siftə
Oktyabrın 22-si İtaliyada yeni hökumət fəaliyyətə başlayır. Prezident Serco Mattarelladan rəsmən mandat alan İtaliya Qardaşları Partiyasının lideri Corca Meloni ölkə tarixində ilk qadın baş nazirdir.
Novator.az bildirir ki, 1977-ci ildə paytaxt Romada doğulan Corca Meloni 2006-cı ildən parlamentin alt qanadının – Deputatlar Palatasının üzvüdür. Palata sədrinin müavini (2006-2008), gənclər naziri (2008-2011) postlarını tutub. İtaliya Qardaşları Partiyasına 2014-cü ildən liderlik edir.
Parlament respublikası olan İtaliyada əsas siyasi fiqur baş nazirdir. Hökumət qanunverici orqanın palatalarında təmsilçilik əsasında formalaşır. Sentyabrın 25-də keçirilmiş parlament seçkisində sağlar həm 400 nəfərlik Deputatlar Palatasında, həm yuxarı palatada (Senat) çoxluğa sahib çıxıb. Sağ cinahda əsas qüvvə İtaliya Qardaşları Partiyasıdır.
Dövlət başçısı olan prezidenti parlament palataları üzvləri və bölgə təmsilçilərini birləşdirən kollegiya seçir. Serco Mattarella prezident postunu 2015-ci ildən tutur.
