Rəsmi Bakının yeni sözçüsü
Ayxan Elxan oğlu Hacızadə Xarici İşlər Nazirliyinin mətbuat xidmətinin rəhbəri təyin edilib. Rəsmi məlumat oktyabrın 20-də yayılıb.
1981-ci il təvəllüdlü Ayxan Hacızadə Bakı Dövlət Universitetinin beynəlxalq münasibətlər və beynəlxalq hüquq fakültəsinin bakalavr və magistr pillələrini bitirib.
ABŞ-ın Milli Müdafiə Universitetində strateji təhlükəsizlik elmləri üzrə magistr dərəcəsi alıb, xarici ölkələrin bir sıra tədris proqramı və təlimlərinin məzunudur.
2007-ci ildən Xarici İşlər Nazirliyində müxtəlif diplomatik vəzifələr tutub. 2010-2014-cü illərdə Azərbaycanın Avstriyadakı səfirliyində, ATƏT və BMT-nin Vyana şəhərində yerləşən təşkilat və qurumları yanında daimi nümayəndəliyində üçüncü və ikinci katib, 2017-2022-ci illərdə Azərbaycanın ABŞ-dakı səfirliyində birinci katib və müşavir vəzifələrində çalışıb.
2022-ci ilin iyul ayından Xarici İşlər Nazirliyinin Mətbuat Xidməti İdarəsinin rəis müavini olub.
Novator.az bildirir ki, nazirliyin əvvəlki sözçüsü Leyla Yaşar qızı Abdullayeva oktyabrın 17-də Azərbaycanın Fransada səfiri təyin edilib.
