Media Reyestrindən keçməyəni məhkəmə gözləyir
2022-ci il fevralın 8-də qüvvəyə minən “Media haqqında” qanun Media Reyestri tələbi qoyur. Bu işə Medianın İnkişafı Agentliyi məsuldur. Proses oktyabrın 14-də başlayıb.
“Turan”a açıqlama verən agentlik rəsmisi Səidə Şəfiyeva deyib ki, “Media haqqında” qanunun 78.3-cü maddəsinə əsasən, qanun qüvvəyə minənədək fəaliyyət göstərən çap mediası və onlayn media subyektləri Media Reyestri formalaşdığı tarixdən 6 ay müddətində Medianın İnkişafı Agentliyinə müraciət etməlidir: “Media Reyestri fəaliyyətə başladıqdan 6 ay sonra qanunun 78.3-cü maddəsi öz hüquqi qüvvəsini itirir və həmin tarixdən sonra qanunun 62.2-ci maddəsi yaranma tarixindən asılı olmayaraq bütün media subyektlərinə münasibətdə tətbiq edilir.
Qanunun 65.4.4-cü maddəsinə əsasən, 62.2-ci maddəyə uyğun olaraq Medianın İnkişafı Agentliyinə rəsmi müraciət edilmədikdə və ya həmin müraciətdə göstərilən məlumatların doğru olmadığı aşkarlandıqda çap mediası və onlayn media subyektlərinin fəaliyyətinin qanuna uyğunsuzluğu məsələsi məhkəmə qaydasında mübahisələndirilir”.
Novator.az bildirir ki, Medianın İnkişafı Agentliyi 2021-ci il yanvarın 12-də Kütləvi İnformasiya Vasitələrinin İnkişafına Dövlət Dəstəyi Fondunun (2009-cu il aprelin 3-dən fəaliyyət göstərib) əsasında publik hüquqi şəxs kimi yaradılıb, həmin gün Əhməd İsmayılov icraçı direktor təyin olunub.
