Bayram niyə bayram olunmur?
AXCP sədri Əli Kərimli oktyabrın 18-də Müstəqilliyin Bərpası Gününün dövlət səviyyəsində qeyd olunmamasından narazıdır. O yazır ki, hakimiyyət əvvəlcə Dövlət Müstəqilliyi Gününü iş günü etdirməklə faktiki olaraq bayramlar sırasından çıxardıb: “Ancaq oktyabrın 18-i təqvimimizdə bayram günü kimi qalır. İlham Əliyev prinsipial olaraq bu bayramı qeyd etmir, oktyabrın 18-də xalqı təbrik etmədi. Xarici ölkələrin başçıları Azərbaycan xalqını təbrik edir, ancaq İlham Əliyev yox. Siz dünyada İlham Əliyevdən başqa ikinci dövlət başçısı tanıyırsınızmı ki, başçısı olduğu dövlətin müstəqillik bayramına bu qədər etinasız, biganə olsun?”
Novator.az bildirir ki, 1918-ci il mayın 28-də Azərbaycan Xalq Cümhuriyyəti qurulub. 1920-ci ilin aprelində Rusiya Azərbaycanı işğal edərək cümhuriyyəti süquta uğradıb.
1991-ci il avqustun 30-da parlament dövlət müstəqilliyinin bərpası haqqında bəyannaməyə səs verib, Azərbaycan Respublikası 1918-1920-ci illərdə mövcud olmuş Azərbaycan Xalq Cümhuriyyətinin varisi elan edilib. Oktyabrın 18-də parlamentdə dövlət müstəqilliyi haqda konstitusiya aktı qəbul olunub, dekabrın 29-da həmin sənəd ümumxalq səsverməsi ilə təsdiqlənib.
Uzun illər mayın 28-i Respublika Günü, oktyabrın 18-i Dövlət Müstəqilliyi Günü kimi bayram edilib.
2006-cı ildə Dövlət Müstəqilliyi Günü qeyri-iş günü olan rəsmi bayramlar siyahısından çıxarılıb.
2021-ci ildə mayın 28-i Müstəqillik Günü, oktyabrın 18-i Müstəqilliyin Bərpası Günü kimi rəsmiləşib.
