Artım və azalma göstəriciləri
2022-ci ilin yanvar-sentyabr aylarında Azərbaycanda 98,1 milyard manatlıq, ötən ilin eyni dövrü ilə müqayisədə 5,6 faiz çox ümumi daxili məhsul (ÜDM) istehsal olunub. Novator.az-ın məlumatına görə, hesabatı yayan Dövlət Statistika Komitəsi bildirir ki, iqtisadiyyatın neft-qaz sektorunda 2,5 faiz azalma, qeyri neft-qaz sektorunda 10,1 faiz artım qeydə alınıb.
Əhalinin hər nəfərinə düşən ÜDM 9748,9 manat göstərilir.
Rəsmi açıqlamaya əsasən, müəssisələr və fərdi sahibkarlar yanvar-sentyabr aylarında 64,1 milyard manatlıq, 2021-ci ilin eyni dövrünə nəzərən 0,6 faiz az sənaye məhsulu istehsal edib, neft-qaz sektorunda məhsul istehsalı 1,9 faiz düşüb, qeyri neft-qaz sektorunda 7,2 faiz yüksəlib: “2021-ci ilin yanvar-sentyabr ayları ilə müqayisədə kənd təsərrüfatının ümumi məhsulu 3 faiz artıb. Əsas kapitala 10 milyard 154,4 milyon manat, 2021-ci ilin doqquz ayına nəzərən 4,6 faiz çox vəsait yönəldilib, neft-qaz sektoruna investisiyalar 13,5 faiz azalıb, qeyri neft-qaz sektoruna yönəldilən vəsait 18,1 faiz artıb.
Nəqliyyat sektorunda yük daşınması 12,3 faiz, sərnişin daşınması 38,9 faiz irəli gedib, informasiya və rabitə xidmətlərinin həcmi 15,5 faiz artıb.
Əmtəə dövriyyəsi 2,9 faiz, əhaliyə göstərilmiş ödənişli xidmətlərdən əldə olunan gəlir 7,8 faiz yüksəlib.
Sentyabrın 1-nə muzdlu işçilərin orta aylıq nominal əməkhaqqı 2021-ci ilin eyni dövrünə nisbətən 14,3 faiz artaraq 829 manata çatıb.
Yanvar-sentyabr aylarında əhalinin gəlirləri nominal ifadədə 20,2 faiz artıb, dövlət büdcəsinə 22 milyard 401,5 milyon manat vəsait daxil olub, büdcədən 20 milyard 470,7 milyon manat xərclənib”.
