Klub reytinqi necə yenilənib?
UEFA-nın klub reytinqi yenilənib. Novator.az bildirir ki, Türkiyə və Litva irəliləyib, İsveçrə, Ukrayna, Rusiya (beynəlxalq yarışlardan kənardır) və Bosniya geriləyib.
Azərbaycan 55 üzv arasında 29-cu yerdədir.
2022-2023 mövsümündə komandaları qalan Türkiyə 14-cü, Ukrayna 16-cı, Moldova 32-ci, Latviya 35-ci, Ermənistan 38-ci, Litva 40-cı pillədə qərar tutub.
Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Qrup mərhələsi və sonrakı raundlar üçün 1-5 arası bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Qrup raundlarının sonuna iki turun qaldığı 2022-2023 mövsümündə Azərbaycan 3,250 əmsal əldə edib.
Ölkənin tək təmsilçisi “Qarabağ” Avropa Liqasının G qrupunda mübarizə aparır, 7 xalla ikinci yerdədir, mübarizəni ən azı Konfrans Liqasında davam etdirmək hüququ qazanıb.
Çempionlar Liqasında 5, Avropa Liqasında 5, Konfrans Liqasında 4 komanda növbəti mərhələyə vəsiqəni təmin edib.
