Astanada MDB zirvəsi
Oktyabrın 14-ü Qazaxıstanın paytaxtı Astanada Müstəqil Dövlətlər Birliyinin (MDB) sammiti keçirilib. Novator.az-ın məlumatına görə, sammitə Rusiya, Belarus, Azərbaycan, Qazaxıstan, Özbəkistan, Qırğızıstan, Tacikistan, Türkmənistan prezidentləri, Ermənistanın baş naziri və MDB İcraiyyə Komitəsinin sədri, icraçı katib Sergey Lebedev qatılıblar.
AZƏRTAC xəbər verir ki, əvvəlcə MDB Dövlət Başçıları Şurasının məhdud tərkibdə iclası olub, Azərbaycan prezidenti İlham Əliyev çıxış edib.
Geniş tərkibli iclasda MDB-nin icraçı katibi vəzifəsinin adı dəyişdirilərək baş katib adlandırılıb, Sergey Lebedev baş katib seçilib, sonra sənədlər imzalanıb.
MDB-ni 8 dekabr 1991-ci ildə Rusiya, Belarus və Ukrayna yaradıb.
21 dekabr 1991-ci ildə Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan da MDB-yə qoşulublar.
9 dekabr 1993-cü ildə Gürcüstan da MDB-yə daxil olub.
Rusiyanın hərbi təcavüzünə məruz qalan Gürcüstan 2009-cu ildə MDB-dən ayrılıb, Ukrayna eyni səbəbdən 2014-cü ildən başlayaraq qurumda iştirakını dayandırıb.
