Dövlət dörd nəfərə təzminat ödəyəcək
Avropa İnsan Hüquqları Məhkəməsi oktyabrın 13-də Azərbaycandan şikayətlər üzrə iki qərar elan edib.
Aihmaz.org xəbər verir ki, Heydərzadə və başqa iki ərizəçinin şikayətində Avropa İnsan Hüquqları Konvensiyası ilə tanınan azadlıq və toxunulmazlıq hüququnun pozulduğu iddia olunub. Onlar həm məhkəmə qərarı olmadan həbsdə saxlanmalarını, həm də barələrindəki məhkəmə qərarlarını əsassız sayıblar. Ərizəçilərin biri təqsirsizlik prezumpsiyası hüququnun pozuntusunu da qaldırıb.
Tərəflər kommunikasiya mərhələsində anlaşıb. Anlaşmaya əsasən, Azərbaycan dövləti iki ərizəçinin hər birinə 4250, bir ərizəçiyə 4750 avro təzminat ödəyəcək.
Əmirov məhkəmə qərarının icra edilməməsinə görə 10 sutka inzibati həbs cəzası almasından şikayət edib. O, ədalətli məhkəmə araşdırması hüququnun pozulduğunu bildirib, eyni zamanda Avropa İnsan Hüquqları Konvensiyasının borca görə azadlıqdan məhrumetməni yasaqladığını bildirib.
Bu işdə də tərəflər anlaşıb. Ərizəçiyə 4100 avro təzminat veriləcək.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
