Hakimlərə cəzalar
Oktyabrın 12-də Məhkəmə-Hüquq Şurasının iclası barədə məlumat yayılıb. Rəsmi açıqlamaya görə, 8 hakim intizam məsuliyyətinə cəlb edilib, 1 nəfərin hakimlik səlahiyyətlərinə vaxtından əvvəl xitam verilməsi, 1 nəfərin tutduğu vəzifədən azad edilməsi ilə bağlı qərarlar qəbul edilib, apellyasiya və birinci instansiya məhkəmələrinin bəzi hakimləri barədə intizam icraatları başlanıb.
Novator.az bildirir ki, 2005-ci ildə fəaliyyətə başlayan Məhkəmə-Hüquq Şurasının hakim vəzifələrinə seçkinin təşkili, hakimlərin fəaliyyətini qiymətləndirmək, onları intizam məsuliyyətinə cəlb etmək, hakimlərin iş yerinin dəyişdirilməsi, vəzifədə irəli çəkilməsi təqdimatları vermək səlahiyyətləri var. Şuraya ədliyyə naziri Fikrət Məmmədov sədrlik edir. Qalan üzvlər bunlardır: Ramiz Rzayev (Ali Məhkəmənin sədri), Fuad Ələsgərov (prezidentin köməkçisi, Prezident Administrasiyasının hüquq mühafizə orqanları ilə iş şöbəsinin müdiri), Nizami Səfərov (Milli Məclisin deputatı), Rafael Qvaladze (Konstitusiya Məhkəməsinin hakimi), Hafiz Nəsibov (Ali Məhkəmənin Cinayət Kollegiyasının sədri), Sənan Hacıyev (Ali Məhkəmənin Mülki Kollegiyasının sədri), Qasım Əliyev (Naxçıvan Muxtar Respublikası Ali Məhkəməsinin sədri), Azər Cəfərov (ədliyyə nazirinin müavini), Mübariz Əkbərov (Bakı Apellyasiya Məhkəməsinin sədri), Tofiq Paşayev (Sumqayıt Apellyasiya Məhkəməsinin sədri), Xəqani Tağıyev (Gəncə Şəhər Məhkəməsinin sədri), Şəlalə Həsənova (Bakı İnzibati Məhkəməsinin hakimi), Anar Bağırov (Vəkillər Kollegiyasının Rəyasət Heyətinin sədri), Heydər Məmmədov (baş prokurorun müavini).
