Azərbaycanı norveçli deputat monitorinq edəcək
Oktyabrın 12-də Avropa Şurası Parlament Assambleyasının Monitorinq Komitəsi Azərbaycan üzrə yeni məruzəçi təyin edib. “Turan” xəbər verir ki, avstriyalı Stefan Şennakı norveçli Liz Kristoffersen əvəzləyib. Onun səlahiyyət müddəti 5 ildir.
1955-ci il təvəllüdlü Liz Kristoffersen Leyborist Partiyasının üzvüdür. Norveç Parlamentində 2005-ci ildən, Avropa Şurası Parlament Assambleyasında 2009-cu ildən təmsil olunur. Şimali Makedoniya üzrə məruzəçi olub.
1949-cu ildə yaradılan Avropa Şurasının əsas institutları üzv ölkələrin xarici işlər nazirlərindən ibarət Nazirlər Komitəsi, milli parlament üzvlərindən ibarət Parlament Assambleyası və hakimləri üzv ölkələrdən seçilən Avropa İnsan Hüquqları Məhkəməsidir.
Azərbaycan Avropa Şurasına 2001-ci ildə qoşulub.
