Sahibkarlıq sahəsində yenilik layihəsi
“Mikro, kiçik və orta sahibkarlığın inkişafı haqqında” qanun layihəsi parlamentin 11 oktyabr iclasında ilk oxunuşdan keçib.
Novator.az bildirir ki, layihəyə görə, mikro, kiçik və orta sahibkarlığın inkişafı sahəsində fəaliyyətin əlaqələndirilməsi məqsədilə səlahiyyətli qurumun yanında daimi fəaliyyət göstərən koordinasiya qrupu yaradılır. Koordinasiya qrupunun tərkibini, habelə səlahiyyətlərini və fəaliyyəti ilə bağlı məsələlər haqqında əsasnaməni icra hakimiyyəti orqanının müəyyən etdiyi orqan (qurum) müəyyən edir.
Səlahiyyətli qurum mikro, kiçik və orta sahibkarlıq subyektləri haqqında müvafiq məlumatların daxil edildiyi mikro, kiçik və orta sahibkarlıq subyektlərinin vahid reyestrini yaradır. Reyestrin aparılması qaydası və həmin reyestrə daxil edilməli olan məlumatların siyahısı əsasnamə ilə müəyyən edilir.
Dövlət dəstəyi almaq üçün müraciətlərin edilməsi və onlara baxılması “İnzibati icraat haqqında” qanunla müəyyən edilmiş qaydada həyata keçirilir.
Mikro, kiçik və orta sahibkarlıq subyektlərinə əlavə dəstək göstərilməsi nəzərdə tutulan iqtisadiyyatın prioritet sahələrinin siyahısını icra hakimiyyəti orqanının müəyyən etdiyi orqan (qurum) təsdiqləyir.
Dövlət maliyyə dəstəyini dövlət büdcəsinin vəsaiti hesabına və (və ya) müxtəlif güzəştlər şəklində aidiyyəti dövlət orqanları (qurumları) göstərir.
Layihə mikro, kiçik və orta sahibkarlıq subyektlərinə məsləhət və informasiya dəstəyini, mikro, kiçik və orta sahibkarlıq subyektlərinin işçilərinin hazırlığı, təkrar hazırlığı və ixtisaslarının artırılması sahəsində dövlət dəstəyini, mikro, kiçik və orta sahibkarlıq subyektlərinin innovasiya, məhsul istehsalı və xidmət sahəsində dəstəklənməsini də nəzərdə tutur.
