Sükançı dəyişmədi
AFFA İcraiyyə Komitəsinin 4 oktyabr iclasında Azərbaycan milli komandasının baş məşqçisi məsələsinə baxılıb. Novator.az-ın məlumatına görə, italyan Canni De Byazi daha bir illiyə postunda saxlanıb.
1956-cı il təvəllüdlü Canni De Byazi yığmaya 2020-ci il iyulun 10-dan baş məşqçilik edir. Müqavilənin ilk müddəti 2021-ci il noyabrın 30-da, ikinci müddəti 2022-ci il sentyabrın 30-da başa çatıb. Milli bu iki müddət ərzində 28 oyun keçirib: 5 qələbə, 7 heç-heçə, 16 məğlubiyyət.
Ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olmuş Canni De Byazi məşqçi kimi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
Milli komandanın sükanı arxasında əvvəllər Ələkbər Məmmədov, Ağasəlim Mircavadov, Kazbek Tuayev, Vaqif Sadıqov, Əhməd Ələsgərov, İqor Ponomaryov, Əsgər Abdullayev, Karlos Alberto Torres, Şahin Diniyev, Berti Foqts, Robert Prosineçki, Qurban Qurbanov, Nikola Yurçeviç dayanıb.
