Avro məkanında inflyasiya
Avro zonasına daxil olan bəzi ölkələrin inflyasiya göstəriciləri açıqlanıb. Novator.az-ın məlumatına görə, Worldofstatistics.org-a istinad edən iqtisadçı Samir Əliyev yazır ki, 2022-ci ilin sentyabr ayında Estoniyada istehlak 2021-ci ilin eyni dövrünə nəzərən 24,2 faiz bahalaşıb: “Litvada qiymətlər 22,5 faiz, Latviyada 22,4 faiz, Niderlandda 17,1 faiz, Slovakiyada 13,6 faiz, Yunanıstanda 12,1 faiz, Belçikada 12 faiz yüksəlib.
Avstriyada inflyasiya 11 faiz, Almaniyada 10,9 faiz, Sloveniyada 10,6 faiz, Portuqaliyada 9,8 faiz, Finlandiyada 8,4 faiz, Maltada 7,3 faiz, Fransada 6,2 faiz həddində rəsmiləşib”.
Yüksək inflyasiya Ukraynaya total hərbi təcavüz edən Rusiyaya dünya birliyinin sanksiyaları nəticəsində iqtisadi düzənin pozulmasından doğur.
Avro nağdsız dövriyyəyə 1999-cu il yanvarın 1-də buraxılıb, 2002-ci il yanvarın 1-dən real pul vahidi kimi işlədilir, Avropa İttifaqının 19 ölkəsində milli valyuta sayılır: Almaniya, Avstriya, Belçika, Estoniya, Finlandiya, Fransa, İrlandiya, İspaniya, İtaliya, Kipr, Latviya, Litva, Lüksemburq, Malta, Niderland, Portuqaliya, Slovakiya, Sloveniya, Yunanıstan.
Avropa İttifaqı üzvü olmayan daha 6 ölkə avro zonasına daxildir: Andorra, Kosovo, Monako, Monteneqro, San Marino, Vatikan.
