İşğal fərmanları
Rusiya prezidenti Vladimir Putin sentyabrın 29-u axşam Ukraynanın Zaporojye və Xerson vilayətlərini “suveren və müstəqil” subyektlər kimi tanıyan fərmanlar imzalayıb. Bu saxta sənədlər işğalın növbəti mərhələsidir.
Novator.az xatırladır ki, Rusiya 2014-cü ilin fevralında Ukraynanın Krım yarımadasını zəbt edib, martın 18-də Krım Muxtar Respublikası (Krım Respublikası adı ilə) və Sevastopol şəhəri Rusiyaya birləşdirilib.
Həmin il Rusiya Ukraynanın Donetsk və Luqansk vilayətlərinin bir hissəsini də tutaraq “Donetsk Xalq Respublikası”, “Luqansk Xalq Respublikası” adlı rejimlər qurub. 2022-ci il fevralın 21-də Rusiya həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlar aparır. Bu əməliyyatlar nəticəsində Zaporojye və Xerson vilayətlərinin böyük hissəsi də ələ keçirilib.
Sentyabrın 23-dən 27-dək “Donetsk Xalq Respublikası”, “Luqansk Xalq Respublikası” rejimlərində, Zaporojye və Xerson vilayətlərində Rusiya Federasiyasına birləşmək “referendumları” təşkil edilib, müsbət cavab çıxarılan qanunsuz səsvermələrdən sonra rejim rəhbərləri Rusiyaya birləşmək barədə müraciət ediblər.
Sentyabrın 30-da Vladimir Putin işğalçı rejimlərin rəhbərləri ilə ilhaq müqavilələri imzalayacaq. Mərasim paytaxt Moskvada, Kremldə keçiriləcək.
Qamarlanmış Krımı da saydıqda Rusiya 85 subyektdən ibarətdir: 22 respublika, 4 muxtar mahal, 1 muxtar vilayət, 9 diyar, 46 vilayət, federal əhəmiyyətli 3 şəhər.
