Canni De Byazi qalır?
AFFA-nın İcraiyyə Komitəsi Azərbaycan milli komandasının baş məşqçisi məsələsinə baxmağa hazırlaşır. Variantlardan biri Canni De Byazinin postda saxlanmasıdır.
İtalyan Canni De Byazi yığmaya 2020-ci il iyulun 10-dan baş məşqçilik edir. Milli onun dövründə 28 oyun keçirib: 5 qələbə, 7 heç-heçə, 16 məğlubiyyət.
Novator.az bildirir ki, 2020-ci ildə UEFA Millətlər Liqasının C divizionunda yarışan yığma 6 xalla 4 komandalıq qrupu 3-cü yerdə bitirib.
2022-ci ilin dünya çempionatının seçmə mərhələsində milli 5 komandalıq qrupu 1 xalla sonuncu pillədə tamamlayıb.
2022-ci ildə UEFA Millətlər Liqasının C divizionunda oynayan yığma 4 komandalıq qrupu 10 xalla 2-ci yerdə başa vurub.
1956-cı il təvəllüdlü Canni De Byazi ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.
Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
Milli komandanın sükanı arxasında 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç dayanıb.
