Prokurorluq sistemi: qanunlar yenilənir
Milli Məclis prokurorluq sistemi üzrə qanun layihələrinə baxacaq. Novator.az bildirir ki, “Prokurorluq haqqında” qanunun 38-ci maddəsinin ikinci hissəsi ləğv olunur. Həmin maddəyə əsasən, hərbi prokurorluq orqanlarının hərbi qulluqçularına hərbi qulluqçular üçün müəyyən edilmiş pensiya, tibbi və başqa növ maddi və sosial təminatlar da şamil edilir.
“Prokurorluq orqanlarında qulluq keçmə haqqında” qanunda yenilik təklifi 20.8-ci maddənin ləğvini nəzərdə tutur. Həmin maddəyə görə, prokurorluq işçiləri hər il məzuniyyətə çıxarkən onlara iki aylıq əməkhaqqı məbləğində pul təminatı verilir.
Başqa təklifə əsasən, prokurorluq işçilərinin (pensiyaya çıxmış işçilər də daxil olmaqla), o cümlədən onların ailə üzvlərinin tibbi təminatı “Tibbi sığorta haqqında” qanuna uyğun həyata keçirilir; hərbi prokurorluq orqanlarının prokurorluq işçisi olan hərbi qulluqçularına hərbi qulluqçular üçün müəyyən edilmiş daha əlverişli şərtlərlə pensiya, tibbi və başqa növ maddi və sosial təminatlar şamil edilir.
Başqa bir təklif prokurorluq işçilərinin hər ay vəzifə maaşlarının 1,25 misli məbləğində vəzifə maaşına əlavə almasını nəzərdə tutur.
Həmçinin prokurorluq işçilərinə pul mükafatının verilməsi məqsədilə hər il dövlət büdcəsində prokurorluq işçiləri üçün müəyyən olunmuş aylıq vəzifə maaşının 3 misli həcmində əlavə vəsait nəzərdə tutulur.
Yeniliklər 2022-ci il sentyabrın 1-dən tətbiq edilməlidir.
