Azərbaycan milli komandasının mümkün rəqibləri
Oktyabrın 9-u Frankfurt şəhərində 2024-cü ilin Avropa futbol çempionatının seçmə mərhələsinin püşkü atılacaq. 2023-cü ilin mart-noyabr aylarına təyin olunmuş seçmə raunda 53 UEFA üzvü buraxılır (Avropa çempionatının ev sahibi Almaniya seçmə mərhələdən azaddır, Rusiya yarışdan kənar edilib).
Seçmə mərhələ 10 qrupda aparılacaq, birinci və ikinci yerləri tutan ümumilikdə 20 milli komanda final raunduna vəsiqə alacaq.
Daha 3 vəsiqə UEFA Millətlər Liqasının A, B, C divizionlarındakı ən güclü komandalara ayrılıb.
Novator.az bildirir ki, Azərbaycan milli komandası Avropa çempionatının seçmə mərhələsinin püşkünə dördüncü səbətdən qatılır və bu yığmalara rəqib ola bilər:
birinci səbət – Niderland, Xorvatiya, İspaniya, İtaliya, Danimarka, Portuqaliya, Belçika, Macarıstan, İsveçrə, Polşa;
ikinci səbət – Fransa, Avstriya, Çexiya, İngiltərə, Uels, İsrail, Bosniya, Serbiya, Şotlandiya, Finlandiya;
üçüncü səbət – Ukrayna, İslandiya, Norveç, Sloveniya, İrlandiya, Albaniya, Monteneqro, Rumıniya, İsveç;
beşinci səbət – Slovakiya, Şimali İrlandiya, Kipr, Belarus, Litva, Cəbəllütariq, Estoniya, Latviya, Moldova, Malta;
altıncı səbət – Andorra, San Marino, Lixtenşteyn.
1960-cı ildə SSRİ, 1964, 2008, 2012-ci illərdə İspaniya, 1968 və 2021-ci illərdə İtaliya, 1972, 1980, 1996-cı illərdə Almaniya, 1976-cı ildə Çexoslovakiya, 1984, 2000-ci illərdə Fransa, 1988-ci ildə Niderland, 1992-ci ildə Danimarka, 2004-cü ildə Yunanıstan, 2016-cı ildə Portuqaliya Avropa çempionu olub.
