2023 Heydər Əliyev ili elan olundu
Sentyabrın 29-da sərəncam imzalayan prezident İlham Əliyev 2023-cü ili Heydər Əliyev ili elan edib. Prezident Administrasiyasına tədbirlər planına dair təkliflərini iki ay müddətində hazırlamaq tapşırılıb.
1923-cü il mayın 10-u Naxçıvan şəhərində doğulan Heydər Əliyev tarix və dövlət təhlükəsizliyi üzrə iki ali təhsil alıb.
1941-ci ildən Naxçıvan Xalq Daxili İşlər Komissarlığında və Xalq Komissarları Sovetində çalışıb. 1944-cü ildə dövlət təhlükəsizliyi orqanlarına keçən Heydər Əliyev 1965-ci ildən Azərbaycan Dövlət Təhlükəsizliyi Komitəsi sədrinin müavini, 1967-ci ildən sədri vəzifəsini tutub.
1969-cu il iyulun 14-dən Heydər Əliyev Azərbaycan Kommunist Partiyası Mərkəzi Komitəsinin birinci katibi – respublika rəhbəri, 1982-1987-ci illərdə Sovet İttifaqı Kommunist Partiyası Mərkəzi Komitəsi Siyasi Bürosunun üzvü, SSRİ Nazirlər Soveti sədrinin birinci müavini olub.
1990-cı ildə Heydər Əliyev Azərbaycan parlamentinin və Naxçıvan Ali Sovetinin deputatı seçilib, 1991-1993-cü illərdə Naxçıvan Muxtar Respublikası Ali Məclisinin sədri postunu tutub.
1992-ci ildə Yeni Azərbaycan Partiyasının sədri seçilib.
Heydər Əliyev 1993-cü il iyunun 15-də Azərbaycan Ali Sovetinin sədri seçilib, iyunun 24-də Milli Məclisin qərarı ilə prezident səlahiyyətlərini həyata keçirməyə başlayıb.
1993-cü və 1998-ci illərdə Azərbaycan prezidenti seçilib.
2003-cü il dekabrın 12-də vəfat edib.
Azərbaycanda 2007-ci il gənclər ili, 2009-cu il uşaq ili, 2010-cu il ekologiya ili, 2011-ci il turizm ili, 2012-ci il idman ili, 2013-cü il informasiya-kommunikasiya texnologiyaları ili, 2014-cü il sənaye ili, 2015-ci il kənd təsərrüfatı ili, 2016-cı il multikulturalizm ili, 2017-ci il islam həmrəyliyi ili, 2018-ci il Azərbaycan Xalq Cümhuriyyəti ili, 2019-cu il Nəsimi ili, 2020-ci il könüllülər ili, 2021-ci il Nizami Gəncəvi ili kimi qeyd olunub.
2022-ci il Şuşa ilidir.
