İşğal zonasından rus səsi çıxdı
Ukraynanın işğaldakı ərazilərini Rusiyaya birləşdirmək üçün qurulan referendum tamaşası başa çatıb. Novator.az-ın məlumatına görə, Donetsk, Luqansk, Zaporojye və Xerson vilayətlərindəki işğalçı rejimlər qanunsuz səsverməni sentyabrın 23-dən 27-dək keçiriblər. İlkin nəticələrə əsasən, “referenduma” qatılanların mütləq əksəriyyəti (87-99 faizi) Rusiya bayrağının altından keçməyə razılaşıb.
2014-cü ilin fevralında Rusiya Ukraynanın Krım yarımadasını zəbt edib, martda Krım Muxtar Respublikası və Sevastopol şəhəri qanunsuz referendumlar yolu ilə Rusiyaya birləşdirilib.
Həmin il Rusiya Ukraynanın Donetsk və Luqansk vilayətlərinin bir hissəsini tutaraq iki separatçı rejim qurub. 2022-ci il fevralın 21-də Rusiya həmin rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlar aparır. Bu əməliyyatlar nəticəsində Zaporojye və Xerson vilayətlərinin böyük hissəsi də ələ keçirilib.
