İtaliya: mandatlar necə bölünür?
İtaliya parlamentinə sentyabrın 25-də keçirilmiş seçkinin nəticələri dəqiqləşir. Novator.az bildirir ki, ilkin hesabata görə, sağlar 400 nəfərlik aşağı palatada (Deputatlar Palatası) 237 mandata sahib çıxır.
Solların 85, “5 ulduz” hərəkatının 52 mandat götürdüyü, 26 mandatın dörd qüvvə arasında bölündüyü xəbər verilir.
Məlumata əsasən, 200 nəfərlik yuxarı palataya (Senat) sağlar 115, sollar 44, “5 ulduz” hərəkatı 28 mandatla düşür, 13 yeri dörd qüvvə bölüşdürür.
İtaliyada hökumət parlament palatalarında təmsilçilik əsasında formalaşır. Sağ cinahda əsas qüvvə İtaliya Qardaşları Partiyasıdır. 2014-cü ildən bu quruma liderlik edən Corca Meloni İtaliya tarixində ilk qadın baş nazir ola bilər.
1977-ci il yanvarın 15-i paytaxt Romada doğulan Corca Meloni 2006-cı ildən Deputatlar Palatasının üzvüdür. Palata sədrinin müavini (2006-2008), gənclər naziri (2008-2011) postlarını tutub.
