Anım günündə
İkinci Qarabağ savaşının başlanmasından iki il ötür. AXCP sədri Əli Kərimli bu münasibətlə yazır: “Azərbaycanın mərd övladları İkinci Qarabağ savaşında rəşadətlə vuruşaraq torpaqlarımızın çoxunu erməni işğalından azad etdi. Onlar xalqımızın hərb tarixinə yeni qəhrəmanlıq nümunələri yazdılar, milli qüruru bərpa etdilər.
Təəssüf ki, igid hərbçilərimizin savaş meydanında qazandığı böyük zəfəri başa çatdıracaq siyasi iradə olmadı…
Rusiya ordusunun Azərbaycana qaytarılması və savaşdan sonra hakimiyyətin Qarabağ qəhrəmanlarına göstərdiyi biganəlik bizi məyus etsə də, igid ordumuzun hərbi zəfərinə kölgə sala bilməz. Qazilərimizin, müharibə veteranlarımızın igidliyini minnətdarlıqla xatırlayıram. Şəhid ailələrinə sonsuz minnətdarlığımı bildirirəm. Əziz şəhidlərimizə Allahdan rəhmət diləyirəm”.
Ermənistan 1988-1994-cü illərin təcavüzündə Azərbaycanın altıda birini işğal edib.
2020-ci il sentyabrın 27-dən noyabrın 10-dək Azərbaycanın apardığı müharibədə və bu müharibə nəticəsində əldə edilən razılaşmalarla ərazilərin böyük hissəsi azad olunub.
Yuxarı Qarabağa və bölgədən Ermənistana gedən Laçın yoluna Rusiyanın hərbi kontingenti nəzarət edir.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi, Sədərək rayonunun 1, Qazax rayonunun 7 kəndi işğalda qalır.
Rəsmi məlumata görə, İkinci Qarabağ müharibəsində 2908 hərbi qulluqçu şəhid olub, 6 hərbi qulluqçu itkin düşüb.
Sentyabrın 27-si Azərbaycanda işğal altında olan torpaqlarının azad edilməsi uğrunda həlak olmuş şəhidlərin xatirəsini yad etmə günü – Anım Günü kimi rəsmiləşib.
