Novator.az İtaliyada parlament palatalarına seçkinin yenilənmiş nəticələrinə nəzər salıb.

Seçki sentyabrın 25-də keçirilib. İlkin hesabata görə, sağ qüvvələr aşağı palata (Deputatlar Palatası) yarışında 43,8 faiz, sol qüvvələr 26,2 faiz, “5 ulduz” hərəkatı 15,4 faiz, mərkəzçilər 7,8 faiz, başqa qüvvələr 6,9 faiz səs əldə edir.

Yuxarı palataya (Senat) seçkinin ilkin nəticələri belədir: sağlar – 44 faiz, sol qüvvələr – 26 faiz, “5 ulduz” hərəkatı – 15,5 faiz, mərkəzçilər – 7,7 faiz, başqa qüvvələr – 6,7 faiz.

İtaliyada hökumət parlament palatalarında təmsilçilik əsasında formalaşır. Deputatlar Palatası 400, Senat 200 nəfərdən ibarətdir.

Sağ cinahda əsas partiya İtaliya Qardaşları Partiyasıdır. 2014-cü ildən bu quruma liderlik edən Corca Meloni İtaliya tarixində ilk qadın baş nazir ola bilər.

1977-ci il yanvarın 15-i paytaxt Romada doğulan Corca Meloni 2006-cı ildən Deputatlar Palatasının üzvüdür. Palata sədrinin müavini (2006-2008), gənclər naziri (2008-2011) postlarını tutub.